Matthew 15

Anɨtuye yahinoso yahino hohontajo somo yakolonoho.

(Mak 7:1-13)

1Oso hohosohonta a'amu Falisi sohwanji a'amu honɨngkano hungkuno lutɨhwamotofo sohwanji hofɨko Jelusalem ulɨko'mantɨfi hofɨko Jisasɨyepono pmmentohofofoho. 2Nu'mantɨfi ulɨmentohofi, Jɨje inomokomoyo lohwa nakwoe neyakwosafe yahino somo minɨngkayo'njo peho'no yalokwofo. Hofɨko wosopayo wonantɨfeso hofɨko aho mijo ito'no miyatɨku'nyofoho.

3Ose ulahonɨngkofi Jisas ulɨmento, I sekwo sekwoe yahinomnohini inɨngkayo'ne Anɨtuye hungkunomo hwotoho peho'no feelokwofo. 4Anɨtu ole lɨmento, Kɨko jɨje mpohwo na'umo tɨfi finɨngkayo. U, a'amu fihwo kako hungkuno wonyo kanɨngkwohwo kona'wohimo uloso osohwo kako poyo wape'nono. Anɨtu ose lɨmentisofoho. 5I sekwo ole lɨwo'nɨngkohofo, Hwe fihwo kako hamniyoho hi'njo sohwo kanɨngkwohwo kona'wohimo ufo'mayo so'no, i kako sikimo ulɨmontonoho. Ngko hamniyoho yo'mayoso wosejapmmonji ko yoheso ngko ole nto lɨmalefoho. Ngko Anɨtumo uyɨmne'no yohono. Ose lososo kako kanɨngkwohwo ya'umo mufo'manehoho. Ose lɨwo'nɨngkohofɨhwasoho. 6Oso'no sekwo oso yahino homo somo inɨngkawowo'nɨngkohofo so'no sekwo Anɨtuye hungkunomo hwotoho fewo'nɨngkohofɨhwasoho. 7Sekwo a'amu mango'nohino hwasoho. Hohonta hwe Aisaiya sekumne'no hungkuno nehopi lɨmentisofoho. Ole nalɨmento,

8Olo a'amu loso hofɨko hofɨkoe mango mta'ni nje yofe ho'nonɨmawo'nɨngkohofofoho.
I, hofɨkoe sɨmehoso ngkimo mantape'njo iwo'nɨngkohofofoho.
9Hofɨko a'amu hwahoponjo sofe hunoso nomantɨfi Anɨtu mta'angofoho lontɨfi a'amu somo lutɨhwawo'nɨngkohofofoho.
Oso'no hofɨko ngkimo wonyopi jomo ntɨwo'nɨngkohofofoho.
Aisaiya ose lɨmentisofoho.

Yo'mayo a'amufe honɨngkano wonyo imokiyo'ne hungkunofoho.

(Mak 7:14-23)

10Jisas hwe moya'mimo ngkiyepono wapɨfento joho ulɨmentisofoho. Nopahonɨngkofi ulɨmento, Sekwo ito'no nɨpa'nɨngkuji huno fɨsyafɨhupmno. 11Yo'mayo jɨje mangomo johufase'mofososo oso jɨje honɨngkanomo wonyo imo'nnyo'ne'maho. O'o, yo'mayo jɨje mango mta'ni lisoso oso jɨje honɨngkanomo wonyo imokiyo'nefoho. 12Ose ulahonɨngki kakoe inomokomoyo sohwa Jisasɨmo nu'mantɨfi ulɨmentohofi, Oso hungkuno lohinoso a'amu Falisi sohwa nupa'nontɨfi sɨmeho wonyo umo'nɨngkohoho. Oso hiso'no kɨko huno lakiyohoho.

13Ose ulahonɨngkofi Jisas ulɨmento, Yo'mayo ipisayo uyo'neso nje Mpohwo ahwomomo humaso sohwo kako mahulinyoso siki fokafoso somo Mpohwo kako pmpongo hi'nji wae yaofonefoho. 14Sekwo a'amu Falisi sohwamne'no uhwontohumamno. Hofɨkoe syohofoho. Hofɨko tɨmpi'nyo hwafoho. A'amu tɨmpi'nyo huhwo sohwa nom'ne a'amu tɨmpi'nyo somo honɨngkano iputɨhwawo'nɨngkohofɨhwafoho. Hwe tɨmpi'nyo sohwo nom'ne tɨmpi'nyo sohumo honɨngkano iputɨhwasoso oso hwa'u pi'nɨmomo wopɨwesyanjiyoho.

15Ose ulahonɨngki Pita ulɨmento, Oso pahnnɨmo hungkuno nto lohinoso yoloho fonaso. 16Ose ulahonɨngki Jisas ulɨmento, Sekwo hoku huno ane kulaho. 17Ihwoni, yo'mayo hopi'nono mangomo josyohumawo'nɨngkiso oso hiso sɨmehomo wowo'nɨngkohoho. Sɨmeho mta'angoso monje noswaponto i'ango pi'nɨmomo wowo'nɨngkohoho. 18I, yo'mayo mango mta'ni swapɨwo'nɨngkisoso a'amufe huno mta'ni swapɨwo'nɨngkohoho. Oso hiso a'amufe honɨngkano wonyo imo'nɨwo'nɨngkohoho. 19Yo'mayo huno mta'ni swaponteso ole, huno wonyo syafɨsiyo, a'amumo fonjasiyo, nom'ne hwafe ape hufo iyo, ape sikinjomo wonyo ulohofo, yo'mayoso hufo iyo, hwasyo hungkunojo, sitofo hungkunojo, 20oso yo'mayo hiso a'amufe honɨngkano wonyo imokiyo'nefoho. Ou, a'amu fihwo kako kakoe aho mijo miyatɨku'nyo'njo ilohofɨhwosi wosopayo nososo oso hiso kakoe honɨngkano wonyo mmokonehoho. Ose ulɨmentisofoho.

A'mu Kenannta'angosi Jisasɨmo sɨmeho hi'ntnnono nehopi uyɨmentisofoho.

(Mak 7:24-30)

21Oseso Jisas oso ango hopo sopo nulɨko'manto nom'ne hwaho pone hufa'u Taiya'nji Saitoun'nji osopono umentisofoho. 22A'mu temtitofo kengosi hwaho Kenannta'ango noponto Jisasɨmo nu'manto joho ulɨmento, U, Hwe Engofo, kɨko Ntefitɨye imu hwosoho. Kɨko ngkine'no hitoho wakilofono. Towahuno wonyo sohwo nje mumo humaho. Nɨhu'no wonyo ulohofalofoho. 23Ose ulahonɨngki Jisas kako oso a'mu siye hungkunomo asomo mujo'njo imentisofoho. Oseso kakoe inomokomoyo sohwa Jisasɨmo nu'mantɨfi ulɨmentohofi, Olo a'mu losi kako joho lonto lonto tɨfi kinɨngkopalofoho. Kɨko asomo filɨhwajo.

24Ose ulahonɨngkofi Jisas ulɨmento, A'amu Isɨlaelɨso honɨngkano'no tɨpeelokwofo. Oso a'amu somne'no Anɨtu lonuhwojahonɨngki pmmentohe hwo'nyoho. A'musi kako a'amu Isɨlael mta'angi'maho. Kako temtitofo kengiyoho. 25Ose ulahonɨngki a'musi kako noponto Jisasɨ'njo ne lopo hwomtame ulohofonto ulɨmento, Hwe Engofo, kɨko ngkimo nɨfo'maho. 26Ose ulahonɨngki Jisas a'amu Isɨlael so'ntnno a'amu temtitofo kengo so'ntnno pahnnɨmo hungkuno ulɨmento, U, nakwo mehomife wosopayo mehwasi sɨwojomo woho'nɨmofantantaho. O'o, awonoho. Oso wonyofoho. 27Ose ulahonɨngki a'musi syafɨhu'mento, Ngko a'amu Isɨlaelɨnɨ'maho. O'o, sɨwojo pa'nyi'nyoho. Ose syafɨsyonto ulɨmento, Hwe Engofo, kɨko nehopi lohino. I sɨwojoso hofɨko ilɨfiso hofekwo'yohwosa wosopayo nonontɨfi hu'mumokwojahonɨngkofi nɨwo'nɨngkohofofoho. 28Ose ulahonɨngki Jisas ulɨmento, U, a'mu losiyo, jɨje sɨmeho hi'ntnnohinoso engo'njo kiyoho. Kɨko peho'no kumo'noso oso kɨko wotɨpema'monnoho. Ose ulahonɨngki oso hohosohonta oso a'mu siye mu wopɨngo imo'nɨmentisofoho.

Jisas a'amu mnokino'njo somo wopɨngo umokumentisofoho.

29Jisas oso ango hopo sopo nulɨko'manto Mijo Ayo Ngkalili momɨngo mofone sopo nowento hwofɨki'nyo we'e sopo nosonto osopo humamentisofoho. 30Nohumentanɨngki hwe hwoya'mi pi'nɨngoso nu'mantɨfi a'amu sɨfe wonyo'njo so'nji a'amu tɨmpi'nyo so'nji yokino kokato'nnyo so'nji a'amu mampi'nyo so'nji wonyo'wonyo mnokino'njo so'nji oso pi'nɨngo engo somo Jisasɨye sɨfɨki'nyo'mo uhumatɨ'mentohofofoho. Uhumojahonɨngkofi Jisas wopɨngo umokumentisofoho. 31Oseso a'amuso uhwonɨmentohofoso a'amu mampi'nyoso hungkuno nɨhu'no ito'no lahonɨngkofi a'amu yokino kokato'nnyo'njoso wopɨngo imo'nɨngkahonɨngkofi, a'amu sɨfe wonyo'njoso hano uhwanɨngkofi a'amu tɨmpi'nyoso tɨmo honɨngkahonɨngkofi osomo uhwonontɨfi pisopisaho mjalɨmɨwentɨfi hofɨko Isɨlaelɨfe Anɨtu kakoe yofe ho'noma loho'mentohofofoho.

Jisas a'amu ‘foua tausen’ (4000) sohwamo wosopayo uyɨmentisofoho.

(Mak 8:1-10)

32Jisas kakoe inomokomoyo sohwamo joho ulonto ulɨmento, Ngko olo hwe hwoya'mi lomne'no hitoho ntokwoho. Sɨkuno hufa'u sɨhune ngko'nji humantohofofoho. Hofɨko wosopayo anefoho. Mijoho'nohinofoho. Ngko lɨhwatɨme'manji u, hofɨko honɨngkanopo tɨmo sɨkuno'no ikuji nopɨwahupitnnoho. 33Ose ulahonɨngki kakoe inomokomoyo sohwa ulɨmentohofi, Olo hwaho lopo a'amu mohumunyoponoho. Nakwo olo a'amu pi'nɨngo engo somne'no wosopayo ntɨ'mta'ni manehwono. 34Ose ulahonɨngkofi Jisas ulɨmento, Sekwo wopayo alale weho. Ose ulahonɨngki ulɨmentohofi, Nakwoe wosopayoso aho fehohnta'ni hopi'nono fehohnta'ni hufa'uyoho. Oso'nji inanɨku we'eso anga'no anga'nohinoho.

35Ose ulahonɨngkofi Jisas hwe moya'mi somo ulɨmento, Sekwo hwaho lopo fosyohumamno. 36Ose ulonto kako wopayo aho fehohnjo hopi'nono fehohnta'ni hufa'uyo oso'nji inanɨku'nji nomanto Anɨtumo isamoyoka ulonto wopayoso kutɨkujo lohofonto kakoe inomokomoyo sohwamo uyɨmentisofoho. Nomantɨfi oso hwe moya'mi somo uyɨmentohofofoho. 37A'amuso wopayo nontɨfi sɨmeho uhnnɨngkahonɨngki nulɨfee'mentohofoso mɨhu'mokumentohofofoho. Nomɨhu'mokontɨfi ho'yo aho fehohnjo hopi'nonohino fehohnta'ni hufa'u mehu'memeehumentohofofoho. 38Hwe sohwa oso wosopayo nɨmentohofosofoua tausen (4000) hwafoho. Oseso moya'mi mehomi so'no hofɨko atofo malɨmentohofofoho. 39Jisas oso hwe moya'mi somo noluhwajonto yofayokinomo nokotasontɨfi hwaho Makatan nongkihnta'ni wako'mentohofofoho.